kriminalvårdare

Já ég er ekki búinn að vera duglegur að skrifa í sumar.. en ég er ekkert að afsaka það. Nú er ég loksins búinn að fá vinnu og á að byrja á morgun. Þetta er mjög spennandi og ég veit í sjálfu sér ekkert við hverju ég má búast. Eina sem ég veit er að þarna verð ég að vinna í gæsluvarðhaldsfangelsi svokölluðu 'häkti' þar sem fangarnir bíða dóms. Nú er bara að fara í víking á vídeóleigurnar og fríska aðeins uppá minnið með þessum skemmtilegu fangelsismyndum sem koma alltaf með jöfnu millibili. Hér er topp sex:

1. Shawshank Redemption
2. Clockwork Orange
   
3. American History X
4. Midnight Express
5. Bad Boys
6. Green Mile

listinn er að sjálfsögðu að algjörlega óyfirveguðu ráði lagður hér fram og verður endurskoðaður eftir því sem ég nenni að skoða myndirnar. Svo verður maður náttúrulega að grafa upp Rimlarokk, Jailhouse Rock og að síðust Johnny Cash Live in Österåker en það er einmitt staðurinn sem ég er að fara vinna á :)

Midsommar

Fólk kom til okkar í garðinn um hádegisbilið. Að hætti sænskra var étin síld, drukknir snafsar og að sjálfsögðu sungnar ölvísur/snafsavísur eða hvað það nú heitir. Milli 2 og 3 var síðan farið að Rönninge By og horft á fólki í búningum dansa í kringum Midsommarstöngina. Það var mjög kósí stund og þegar allir voru orðnir þreyttir á harmónikkuvælinu og 'Små Grodorna' sem er alltaf sungið við þetta tilefni af ungum sem öldnum þá hélt allur skarinn heim á leið aftur. Nú var tekið til við að grilla og saxa grænmeti og þess háttar. Krakkarnir skemmtu sér fáklædd í sólinni ýmisst á trampólíni nágrannans eða í vatnsbaði eins og sést á myndinni. Takk allir hlutaðeigendur fyrir yndislegan dag :)

Dýragarðurinn heimsóttur

Við hjónin fórum með Rúnu Lóu, Hlyn og Óla í Kolmården í gær. þegar við fórum síðast í þennan sama dýragarð þá var Rúna Lóa varla talandi en það var fyrir tæpu einu ári. Nú hins vegar heita öll dýrin Lamadýr eftir heimsókn okkar í sveitina til Henriks og hún heilsaði dýrunum öllum kumpánlega og kvaddi þau með virktum. Öll nema geitunum því hún varð fyrir því óláni að lenda í geitaslag í fyrra, enda vildi hún ekkert klappa þeim að þessu sinni. Þetta var heitasti dagur sem ég hef upplifað hér í Svíþjóð - eiginlega óbærilegt ég er nú hlynntari svalari hitatölum en þó er ég ekkert á því að fá rokið sem ávallt er á Íslandi. Við erum öll farin að maka á okkur sólvörn á hverjum degi PVC frá 2 og upp? 60. Okkur er farið að hlakka mikið til Midsommar en þá er von á fólki hingað í garðinn til okkar. Fullt af skemmtilegu fólki ætlar að koma og svo verður étin síld (það er víst einhver hefð) og drukkinn snafs. Síðan förum við að einhverjum bæ þar sem midsommarstöngin verur reist svo komum við aftur hingað og grillum eða eitthvað.

Emilía Þórný Ólafsdóttir

Vinafólk okkar Íris og Óli eignuðust dóttur 4. júlí hún hefur fengið nafnið Emilía Þórný og við hér á Forsvägen 60 óskum þeim að sjálfsögðu hjartanlega til hamingju. Íris og Óli eru með heimasíðu þar sem hægt er að sjá frumburðinn, myndarstúlka enda á hún ættir að rekja til Aðalvíkur norður á Ströndum.

Rösjöbadet

Fórum í göngutúr niður að Rösjö sem er alveg yndislega fallegur staður í um 10 mínútna fjarlægð frá heimilinu okkar. Þarna fóru strákarnir og syntu síðasta sumar. Við treystum okkur ekki til að kasta okkur útí enda ennþá skítkallt í vatninu og í skugga.

brummm brumm

Skemmtilegasta leiktækið hennar Rúnu Lóu á leikvellinum hérna inni í skóginum er bill sem hún þykist keyra um í. Svo er voða gaman að gunga og fara í sandlådan.

húsakaup og epilepsia

Það er mikið sem gengur á hér hjá okkur hjónakornunum. Við erum búin að vera að leita fyrir okkur að húsnæði og núna erum við búin að finna raðhús í Österåker sem við erum búin að gera tilboð í. Núna sitjum við með krosslagða fingur og bíðum eftir að fasteignasalinn hringi. Hér
er linkur á húsið..
Annars er ég rétt að ná mér núna eftir verstu flogaveikiköst sem ég hef fengið í mörg ár. Þetta virðist því eitthvað vera að versna hjá mér því að það er ekki að sjá að ég hafi gleymd lyfjum eða hegðað mér á einhvern óskynsamlegen hátt á undanförnum dögum. Það sem er skrítið við þetta er að ég hef verið svo ringlaður eftir kastið.. mikill höfuðverkur og gleymskan alveg í hámarki. Gaman það..

Túlípanar

Var að bæta inn nýju myndaalbúmi. Í þessari fyrstu tilraunasyrpu getur að líta myndir sem við hjónin tókum um síðustu helgi. Við gistum í Uppsölum í góðu yfirlæti hjá Möggu og Henrik. Á sunnudag keyrðum við síðan suður í Huddinge í kaffi og kruðerí hjá Guðrúnu þar sem Nassinn gleymdist, en hann hefur nú verið endurheimtur. Myndaalbúmið er að finna hér og hægra megin á síðunni..

att trivas

Hur trivs du? spurning sem maður fær oft hér í Svíþjóð sem þýðir eiginlega hvernig þrifst þú? í nýja húsinu, í landinu, í vinnunni, skólanum og svo framvegis.. setti þessa mynd sem dæmi um að Rúna Lóa trivs väldigt bra här i Sverige.

Lóa og Lamadýrin

Dýrin voru frekar stygg og Rúnu Lóu tókst ekki að gefa þeim hrökkbrauð eins og til stóð en það gefst kannski annað tækifæri. Annars var hún bara mjög huguð innan um þessi stóru dýr í þessu geysifallega umhverfi. Tómas þessi fyrir neðan í rauða vestinu, hinn er frændi hans, sem ég veit ekki hvað heitir. Örugglega Ludde eða Karl-Erik eða eitthvað álíka sænskt :) en ekki hvað..

Lamadýr i öppna landskap

Fórum út í sveit þar sem Henrik maðurinn hennar Möggusin er alinn upp. Ákaflega fallegur staður sem á sér mjög langa sögu. þarna áttu var mikilvægur áningarstaður á leið með vörur til stærri vikingabyggðar tam Birka. Þarna eru fornminjar frá þessum tíma og svo rúnasteinar sem eru svo að segja við hvern hól hér í Svíþjóð. Á bænum er aðallega stunduð nautgriparækt með öllu tilheyrandi þe framleidd mjólk, nautakjöt og rosalegir delikatess ostar sem hafa fengið mikla viðurkenningu. Ostarnir heita Focksta og eru frá Mama Mu:s delikatess. Það sem var hvað merkilegast var að sjá lamadýrin 3 á beit í haganum. Þau eru í pössun þarna á bænum og eru því ekki hugsuð sem landbúnaðarafurðir en af því sem mér skilst þá eru þessi dýr viðföng í einhverri medisínskri tilraun, áhugavert það.

Sundgarpar

Einn daginn vaknaði sú stutta og sá sundbolinn sem við keyptum á Íslandi og sagði ' sund, sund, sund ' og linnti ekki látunum uns við létum undan og fórum í sund. Skruppum niður til Södertälje þar sem Sydpoolen er, en þar er mikið ævintýraland og ískaldar laugar og rándýrt inn - já og takmarkaður tími við 3 klukkustundir.. En þetta var frábær sundferð engu að síður þó ég hafi varla nennt til að byrja með. Rúna skildi hugrekkið eftir heima að þessu sinni og við eyddum mestum tíma í eina heita pottinum á svæðinu. Á 10 mínútna fresti voru allir reknir uppúr pottinum í 4 mínútur og 45 sekúndur til þess að hreinsa pottinn. Mjög effektift gegn drolli.

Bella Símamær

Á tali við Ömmu Lóu.

Hægur andvari

Frekar rólegt að gera hjá okkur hér í Svíþjóð um þessar mundir. Leikskólafrýrnar eru að krúttast yfir sig á Rúnu Lóu þar sem hún situr venjulega ein og syngur og trallar með sjálfri sér. Fengum í dag boð um að vera viðstödd 50 ára afmæli Nóbelsverðlaunanna, þeas 50 ár eru síðan Halldór Laxness hlaut þessi verðlaun og haldið verður uppá það hér í Stokkhólmi þann 23. apríl í sænsku akademíunni. Við erum að íhuga hvort við eigum að skella okkur.

Stuð, stuð, stuð..

Ég er í svaka stuði..

Borða á pallinum

AAAaahhh oppnna svo.. Auðvitað eru allir með þegar borðað er á pallinum í fyrsta skiptið í sumar (eða ætti ég að segja vor) Baby Born og Nassi fá að borða líka.

Dæmigert veðurblaður

Þá erum við í Sverige aftur eftir geðbiðala Íslandstörn. Rúna Lóa varð ákaflega ánægð að komast heim í húsið sitt og hefur verið úti í garði síðan við komum heim. Þegar við komum til baka bjuggumst við við að vorið væri komið og allur snjór farinn en það var öðru nær. Garðurinn var fullur af snjó en þokkalega heitt í veðri miðjan daginn. Á sunnudaginn síðasta borðuðum við úti á palli og veðrið fór 17° og en það er enn soldið kalt í skugganum. Jói Páll gisti hjá okkur frá fimmtudegi til mánudags en hann var í æfingabúðum í Aikido hjá móðurfélagi sínu hér í Stokkhólmi sem heitir http://www.iyasaka.se/ Seinna skruppum við Jói svo á krá sem heitir Vasa Café og bar, eftir mjög góðan göngutúr um mér liggur við að segja allan Stokkhólm. Svo fórum við heim og settum í þvottavél og þurrkara.. ákaflega týpískt..

Ísland og söknuður

Nú styttist í það að við komum til Íslands og við erum farin að hlakka alveg rosalega mikið til. Við hörum verið að pæla í því hvað við ætlum absolut að gera þegar við komum til Íslands en það eru nokkrir hlutir sem eru MJÖG ofarlega á lista hjá okkur núna. Eins og tam að fara í sund. Og jafnvel Röggu er farið að langa í lambakjöt? skrítið hvernig fjarlægðin getur farið með mann. Mér segir sá hugur að ísbúðin á Hagamelnum verði heimsótt og svo er búið að ákveða að fara á Súfistann og drekka kaffi og lesa ísl. blöð í kósí. En það sem mestu máli skiptir er auðvitað að hitta alla ættingjana og vinina sem við erum farin að sakna alveg ótrúlega mikið :(

veikindi og snjókoma

Það er ástand á heimilinu núna. Nú liggjum við öll í veikindum, ég slapp lengi vel en í gær fann ég að þetta var að hellast yfir mig. Ragga hefur þó verið veikust og núna er byrjuð vika 2 í hennar veikindum. Rúna Lóa hefur trítlast þetta með, verið með hita og nefrennsli en verið nokkuð hress að venju. Á meðan þessum veikindum hefur staðið hefur snjóað alveg fáránlega mikið og nú skil ég loksins ástæðuna fyrir snjóblásaranum í bílskúrnum - svakalegt tæki.

múmíur og mont

Núna er ég að læra um Egyptaland og þar af leiðandi múmíur og svoleiðis vesen. EIns og almennilegum föður sæmir þá sagði ég dóttur minni 1 og hálfs árs að bókin sem ég er að lesa er um múmíur. Daginn eftir þegar hún sér bókina bendir hún á hana og segir múmí múmí.. voðalega spennt. Mér finnst ekki eðlilegt hvað hún er klár þessi skotta. Annars er myndin af Ramesses II sem varð ríkti í Egyptlandi 1279-1212 f.kr og var ákaflega merkilegur gaur. Hann ríkti í 67 ár varð níræður. Hann átti margar konur á og er talið að hann hafi átt yfir 100 börn.

Hrútspungar og sviðasulta

Þorrablót Íslendingafélagsins hér í Stokkhólmi er á næstu grösum. þe um næstu helgi og einhverjum vitringum datt í hug að hafa það soldið grand að þessu sinni. Og hvað haldið þið.. Veislustjóri kvöldsins verður enginn annar en hinn eini og sanni Ómar Ragnarsson jíhú og hljómsveitin KUSK leikur fyrir dansi.. Rétt upp hend sem hefur heyrt á hana minnst.. nei ekki ég heldur... en ég er búinn að grafa það upp að hún er frá Hornafirði og kann að spila Living next door to Alice... Glæsilegt :) En þetta virðist samt trekkja því það eru um 200 manns búnir að melda sig. Þetta verður örugglega ótrúlegt stuð. Staðurinn sem þorrinn verður blótaður

Nordiska språk och Antik historia

Líf mitt hefur tekið stakkaskiptum síðastliðnar vikur. Í staðinn fyrir að vita ekki í hvora nösina ég á að bora þá flakka ég á milli Uppsala og Stokkhólms nokkrum sinnum í viku því ég komst inn í nám í háskólanum þar nyrðra með skömmum fyrirvara. Viðfangsefnið að þessu sinni er sænska (grammatik och still) og síðan kúrs sem heitir "Tidiga kulturer i Östra Medelhavsområdet" Þetta er allt saman mjög spennandi og fullt að gera. Ég var að enda við að lesa ákaflega góða bók sem heitir En Komikers Uppväxt e. Jonas Gardell og fjallar hún um ógeðslegt einelti, ekki það að einelti er alltaf ógeðslegt en stundum tók bara virkilega á að lesa þessa bók. Síðan sagði kennarinn okkur að Jonas byggir á reynslu sinni úr bernsku, en hann sjálfur varð fyrir miklu einelti sem barn og unglingur.

Lestrarmeiddi

Frá unga aldri hefur hennar helsta dægradvöl verið lestur. Nú er svo komið að hún er farin að slasa sig við þessa iðju. Langt sár eftir kjöl bókar niður eftir öllu lærinu og niður á kálfa. Við lesum fyrir hana þegar hún kemur úr leikskólanum, áður en hún sofnar á kvöldin og síðan strax þegar hún vaknar á morgnanna. Þess á milli les hún í leikskólanum sænskar bækur en þar heita sögupersónurnar ekki Lúlli, Einar Áskell eða Tumi heldur er hún að lesa um Ludde, Alfons Åberg og Todde en Emma er allfaf sama góða Emma. Sumar barnabækurnar sem við höfum verðið að lesa eru mjög skrítnar og boðskapurinn eitthvað undarlegur. Við höfum komist að því hjónakornin á Forsvägen 60 að sennilega er enginn sem er eins lestrarhneigður og unginn, nema ef vera skyldi gagnrýnandinn þarna - kolbrún. En mér er það til efs að hún hafi rumskað á næturna og sagt upp úr hálfum hljóðum LESA eða á það að vera LÄSA

Melinda och Melinda

Konan var með saumaklúbb í gær og þá notaði ég tækifærið og fór í bíó. Það hef ég ekki gert síðan ég sá hina ótrúlega slöku The Forgotten
. Í gær fór ég hins vegar að sjá frábæra mynd Melinda och Melinda eins og hún heitir hér í Svíþjóð. Myndin byrjar á því að fólk situr að snæðingi og fjallar um sögu sem það heyrði og hvarnig það túlkar hana. Sumir túlka hana sem drama og aðrir sem kómík. Mjög skemmtileg mynd frá Woody Allen. 3/4

Hlynur

þessi er tekin af Hlyni í sumar þegar við vorum stödd í húsi Lóu og Sigfúsar á Sandi í Aðaldal. Yndislegur tími og gott veður. Takk fyrir okkur

Rúna Lóa

þessi mynd var tekin af stoltum húseiganda milli jóla og nýárs þegar hún sýndi Hlyni og Sindra húsið sitt og færni sína í eldhúsinu.

Sindri Snær

Sindri Sæti á aðfangadagskvöld að bíða eftir að við opnuðum pakkana. Strákarnir fengu að opna einn pakka kl. 6 og síðan voru pakkarnir opnaðir þegar við vorum búin að ganga frá eftir matinn.